Taratasin'i Zama ,

Akory ianao ry zoky malala,

Dia nilaozanao koa izahay ,ka lasa ianao ary mba rahoviana ny anjarako ?

Tsy ho lava resaka aho akory fa teny fohy ihany .

Latsaka ny ranomason'i Neny , i Dada kosa toa tsy be teny lasalasa vinany nahita anao niditra anatin'iny fiaramanidina be iny. Be ireo hafatra, maro koa ireo toro hevitra , ka aza adino re ireo na dia aty alavitra aty aza ianao; saino , eritrereto rahavana, halao ambony halao ambany .

Aza atao ambanin-javatra ny tenin-dray aman-dreny , fa fitiavana no hanaovany an' izany .

Sady koa anie Razoky aza adino fa raha zaza hono tsy hendry , ny ray aman-dreny no voa-tombantombana .

Koa sao mampievona ny maty any am-pasana fa hajao ny toro hevitra nomen'i Dada sy Neny. Toy ny tsipak'ombalahy hono mantsy ny tenin-dray aman-dreny : raha mahavoa maha faty , raha tsy mahavoa maha fanina.

Izay ary no izy Razoky fa teny kely mba natsipy ny ahy iny .

Veloma mandra-panoratra indray ry zoky malala , fa nilaozanao koa izahay ka lasa amin'izany atao hoe an-dafy ianao . Ary mba rahoviana ny anjarako .